คำหนาน ป่าแป๋

[civilroom]

มีคนเอิ้นตั๊ก กระดานมันหมอง บ่าวเฒ่าวัยทอง เข้ามาแอ่วเหล้น
เอิ้นหาคำญิง แม่ข้าวตอกเต้น บ่หันเข้ามา แต๊ตั๊ก

เอิ้นหาป้อจาย ง่อมเหงาจ้าดนัก เกยม่วนเกยเหล้น มาเมิน
บ่าเดี่ยวหายแส็บ กระดานขัดเขิน บ่ม่วนใจ๋เพลิน เหมือนเมื่อก่อนกี้
เอิ้นหาบ่าวแถ่ว เกยมาตี้หนี้ บ่หันสักคน แต๊นั้น

เอิ้นหาสาวจี๋ อี่นายน้องจั๊น บ่แวะมาหนี้ หลายเดือน
ไปเหล้นเฟสบุ๊ค เลยแซเสลือน ขาดหายหลายเดือน บ่มาจ๋าถ้อง

เคดิต หนานโยธา19

[civilroom]

อ้กสลาย ตั๋วจายสลั้ง เหมือนดั่งปล๋ากั้ง มันโดนทุบหัว
อ้กหม้างอ้กบ่ะ มาป่ะกับตั๋ว ต้องหอบผ้าครัว หนีออกจากบ้าน
เข้าป่าบุ่นพงศ์ ลัดดงป่าต้าน ใจ๋บ่เจยบาล ต้องลี้

เพราะโชคชะต๋า พามาแบบนี้ หื้อมาไจ๊หนี้ ความจน
ลัดดอยเขาโหง้ม ป่าไม้รังสน ฟังเสียงลมบน ขับขานเพลงก้อง
เสียงนกหัวขวาน ประสานตอบถ้อง ลั่นกล๋องทำนอง โปกโป้ก

เคดิต หนานโยธา19

[civilroom]

สลิดซอนใบ หอมไปทั่วทิศ เซาะหาคู่มิตร แนบชิดเปียงใจ๋
ต๋ามโขงเตศต๊อง แห่งห้องหนไหน อยู่ไปเมินไป บ่หันเงื่อนส้น
จ๋ำเป๋นทนเหงา ซบเซาจ้นจ้น บ่มีตี่โยน แนบชิด

เคดิต หนานโยธา19

[civilroom]

นอนกล๋างคืน พลิกฟื้นหลายโต๊บ บ่มีคู่ข้าง แนมคิง
อยากมียอดจู๊ อยากคู่น้องหญิง อยากซ้อนนอนปิง อยากอิงสีข้าง
น้ำย้อยติ๋นก๋อน นอนแข็งกะด้าง ขาดเอวบาง นอนซูก

บ่อยากไปไหน หื้อหัวใจ๋ท้อ ขออยู่ในบ้าน คนเดียว
สาวแก่แม่ฮ้าง ไผไหนจะเหลียว เกิดมาหนเดียว หยังฮะเสี้ยงหั้น
คืนวันหวั่นไหว หัวใจ๋สะบั้น หาความม่วนงัน บ่ป๊ะ

กึ๊ดไปลางที ไค่หนีเข้าวัด บวชเป๋นตุ๊เจ้า หลวงลุง
ก็กลั๋วทางวัด จ๋ำกัดความสูง หวั่นหลวงตุ๊ลุง จีวรหวันก้น
กั๊บใจ๋แต๊หนอ ป้อแม่ก็โหย้น หื้อหาเมียแปง คู่ซ้อน

เพื่อนมีเมียหลาย เลี้ยงจ๋นบ่แป๊ เฮาแผ้หละแหม้ แก่ดาย
คงจะต้องอด เป๋นโสดจ๋นต๋าย อายงัวอายควาย ตี้มีคู่ข้อง
เฮานอนคนเดียว เป๋นเสี่ยวจ้อยหว้อง ยามคึกคะนอง อกกั๊ด

 ผมหัวหงอกขาว ผ่านหนาวผ่านฮ้อน อายุก่ค่อน เกิ่งคน
เกิดมาจ้าดนี้ แสนตี้สับสน ขอเพียงซักคน เอนดูตั๋วข้า
แม่ฮ้างกล๋างหาว กาสาวรุ่นป้า ขอได้มา จ๋าตั๊ก

คนเดียวก็ปอ บ่ขอมีนัก จะฮักจะอ้อน นอนแยง
กับข้าวกู้มื้อ บ่หื้อได้แป๋ง อ้ายจะจัดแจง ตกแต่งหื้อเจ้า
กล๋างคืนจะหวัน กล๋างวันจะเฝ้า เสเลเมา ยอดจู๊

จะย๊ะจาใด ปี๋ไหนก็แคล้ว นอนแจ่วแหว้ว เดียวดาย
ตากลมห่มฟ้า มาก็เมินหลาย หลายปี๋ผ่านไป นอนงอหล้องหง้อง
หากบ่มีไผ เข้ามาเกี่ยวข้อง อ้ายคงอกปอง อกจ๊ำ

เคดิต หนานโยธา19

[Ck 401]

แต่งมาแหมเรื่อยๆเน่อครับ ม่วนดี

[WH_Y]

..สรียินดีจ๊าดนักเน้อเจ้าท่าน civilroom อ่านม่วนขนาดเจ้า..

[civilroom]

ฝากใจ๋

มโนเนือง ดอกเหลืองกลีบแย้ม ทวายข้างแก้ม ชื่นบานหัวใจ๋
เอื้อนเอ่ยกล่าวจี๊ วาทีสดใส ลึกจากทรวงใน หทัยม่อนข้า
แสงจันทร์ขาวนวล รัญจวนส่องหล้า นำสองเรามา พบรัก ...

บุพเพบุพพา ใดจาจู๋งจั๊ก ร่วมพักตร์เคียงใกล้ เตียมคิง
สัญญาแต้ตั๊ก แน่นหนักสัจจิ๋ง จักฮักอวลญิง บ่มลายหายเสี้ยง
สานฝันสานใจ๋ ยามใดหม่นเมี้ยง จักบ่เอนเอียง ร่วมคิด



ในยามมีฮัก หัวใจ๋ดื้อด้าน จะชักอย่างใด บ่แป๊

บ่าวสาวฮักกั๋น ขอหื้อฮักแต๊ จะสมหวังได้ ยืนยง
อันว่าความฮัก ตึงโลภโกรธลง มนุษย์จุคน ย่อมมีกั๋นได้
หื้อมีสติ ตริตรองไจ้ไจ้ บ่ดีหลงไป แต๊นั้น
...
ต้องจ่วยตั๋วเอง ไผบ่มาก๊ำ ฮักได้เลิกได้ แนวทาง
ต้องเผื่อใจ๋ไว้ เรือบ่ควรขวาง น้ำเชี่ยวเป๋นทาง ตึงขวางบ่ได้....

อ้ายหนานโยธา19เปิ้นแต่งในเฟสเบิ้ล อ่านแล้วม่วนดีผมเลยก๊อปมาแชร์หื้อกั๋นอ่าน 

[tawan rung]

หยังมาแก่นอู้ หยังมาแก่นจ๋า แต้ว่า กึดว่ามันเข้าดินเข้าหญ่า ไปแล้ว ตะก่อน ฟังปู่หนานทองใบเล่าค่าวม่วนขนาด หื้อก๋ำลังใจ๋เน้อคับ ขอชมอย่างจริงใจ๋คับ อยู่กรุงเทพฯ มันง่อมคับ

[civilroom]

อกหักก่อนมา น้ำต๋าหล่อเบ้า เจ็บใจ๋ตัวเฮา แต๊แต๊

จะหลาบจะจ๋ำ จ้ำใจ๋ป้ายแป๊ สาวใต้เขาขว้าง ฮ้างไป
บ่หลาบแต๊ตั๊ก ฮักมีเต๋มใจ๋ จะมีสาวใด เปิงใจ๋ผ่ออ้าย
สาวหน้อยสาวจี๋ แม่ฮ้างแม่หม้าย จุ่งเอ็นดูจาย นี้เต๊อะ

ใคร๋เอ็นดูอ้ายเบิ้ลอยากสมัครมาฮักษาแผลใจ๋ก่อบอกผ่านได้เน้อ

[civilroom]

หน่อไม้หลงปี๋ ยังหวังมีก้าน เพื่อผลิใบบาน ปกพื้น
ใต้พสุธา ใฝ่หาความชื้น ยามฝนเหือดแห้ง ครั้งคราว
ถ้วยคู่กับจ๊อน ฮ้อนคู่กับหนาว สั้นคู่กับยาว หนุ่มสาวคู้ห้อง
วัวมีคู่ขา ปล๋ายังคู้ข้อง เงินคู่กับทอง แม่นแล้ว

 เขียดคู่กับงู ควายคู่นกเอี้ยง สะลีคู่เตียง กั๋มม์ก๊ำ
ป่าคู่กับเสือ เฮือคู่กับน้ำ หมีคู่กับถ้ำ เปิ้งปา
ด้วงคู่กับไม้ ไหว้คู่กับสาธุ์ ปู๋คู่กับนา ปล๋าคู่กับข้อง
หาบคู่กับหาม งามคู่กับหย้อง คำคู่กับตอง เชื่อเต๊อะ
หนานหมายคู่ญิง ไว้อิงเติกเมอะ เชื่อเต๊ะตึงได้ สักวัน
ด้วงอยู่ในไม้ มะแห้ยังหัน ลางได้สักวัน ดอมมันอยู่หัน.

ฝนตกยำหัว บ่หนัวก๋างจ้อง ขอสมใฝ่ปรอง จิ่มเต๊อะ

ต๋ามตี่ใฝ่ฝัน เจยบันอย่าเลอะ คู่เมอะแนบใกล้ จายรา
ต๋ามกำป้อไท้ ไขมานั้นหนา ถ้าสมแล้วกา อย่ากลากลาดได้
เดือนสี่หน้าหนาว หาสาวแนบใกล้ คงสมอุรัย กึ๊ดไว้
...
ก๋าละมาเถิง ฮอดเติงแล้วไซร้ จักได้แจกหั้น บัตรเจิญ
ถึงมวลค่าวมิตร ก่ายบันไดเกิ๋น เป๋นแขกขึ้นเฮือน มางานแต่งข้อย.

[civilroom]

ไปเต๊อะคนดี ละขว้างปี้ไว้ หื้อตกอยู่ใต้ ความเมา
กึ๊บทีละก๊ง แม่โขงเหล้าขาว มันก่อตึงเมา แอ่นหลังแอ่นหน้า
เมื่อหม้ดแฮงเตว ก้อนอนป่าหญ้า นอนต๋ามโต้งนา ป่าแพะ

เกยทำความดี ต๋อนนี้ของด จิตใจ๋บ่หมั้น ยืนยาว
เจ็บมามากล้ำ จากดำเป๋นขาว เหลือเพียงกลิ่นคาว ละเอาไว้หื้อ
จะไปโต้ดไผ เพราะใจ๋ด้านดื้อ เมื่อฮักลางเลือน เคลื่อนย้าย



โทมนัส อึดอัดขัดค๊าง นั่งง่อมอยู่บ้าน อกม้างใจ๋ขม
อยู่ก่เดียวดาย ความก้ายมาถม ตังในอารมณ์ ใคร่ห่มใคร่ไห้
ไผผ่อบ่หัน ว่ามันหมองไหม้ บ่ได้สดใส ข้านี้
ใคร่หนีหาย พ่ายดงลับลี้ บ่อยู่เจ้นอี้ มีแต่จะเศร้า
เพื่อนฝูงข้านี้ มีคู่คีมเขา เป็นสังข้าเจ้า บ่สมอุรา
... บ่ใช่แป๋งเหตุ มักเพศกามกล้า คึดแต่ตัณหา ม่วนเล่น
ฤาว่ากรรม มัดงำบีบเค้น ติดต่อซ่ายเวร รำเค็ญหัวใจ
เกิดมาชาตฺนี้ ตึงบ่มีไผ แก้บ่วงนี้ได้ เตไขกอยผ่อ
มาเป็นแฮงใจ๋ อู้ได้เมื่อท้อ จะได้ก่อหา .....จะได้ก่หา

สังสารวัฏฏ์ ผัดเปลี่ยนเวียนมน อยู่ในใจคน กมลแม่นนัก
ยามเหงาเศร้าตุ๊ก สุขใดใจฮัก สลิดสลัก ตักในหัวใจ
คู่ข้างเตียมคิง เกยอิงยามไข้ ยอดฮักข้าไท้ ก็ไปหนีละ


ดาวเต็มฟ้า ข้ายังยะก๋าน อยู่ที่ทำงาน แต๊หนาปี้อ้าย
สังง่อมเหงาใจ๋ เป็นดีใค่ให้ ใค่หลับอยู่นี้ วอยวอย
จะหกโมงแล้ว หยังเป็นดีขอย พระพายจอย นอนขดห่มผ้า
หนาวตี๋นคุมตี๋น หนาวหน้าคุมหน้า กอดหมอนข้าง แอมนอน
หมอนข้างแก่นนี้ แทนที่สมร กอดหนุนนอน เตียมคิงคู่ข้าง
อิดอกอิดใจ๋ ยะก๋านบ่ายั้ง ตั้งหกโมงเจ๊า ตะวา
นั่งอยู่สำนัก ออฟฟิศเคหา บ่ไหวละนา ลวดลาก่อนอ้าย...



เปิงใจ๋ค่าวไหนก่อกดไลท์ฝากมาเน้อ ผมจะไปบอกอ้ายหนานหื้อ

[civilroom]

หนาวนักแก

ลมหนาวพัดพา ก็มาสะท้าน หนาวแต๊ว่าอั้น หนาวถึงหัวใจ๋
หนาวมาถึงแล้ว ตึงบ่สดใส หนาวถึงทางใน หัวอกว่าอั้น
คนที่มีคู่ ม่วนดีบ่กั้น ใจชื่นเจยบาน แต๊นั้น
...
คนอยู่คนเดียว มีแต่บีบคั้น บ่มีไผอั้น นอนเคียง
ง่อมเหงาแต๊ตั๊ก ตึงบ่มีเสียง ขาดคนคู่เคียง ง่อมเหงาบ่หน้อย
เหลียวผ่อทางใด ใจ๋บ่เป่งป้อย หมองใจ๋แต๊เฮา วันนี้

หนาวนักแต๊หนา ปีนี้หนาวแต๊ จะหาทางแก้ อย่างใด
ลมเหนือพัดแล้ว หนาวถึงจิตใจ๋ บ่มีนงวัย เคียงคู่ว่าอั้น
จะมีไผไหน มาผ่อถึงบ้าน หื้อหายง่อมงัน แต๊ตั๊ก

เซาะผ่อหาสาว เจ้าจี๋ดอกรัก อี่น้องมีคู่ แล้วกา
น้องบอกมีแล้ว บ่ต้องเอิ้นหา เดี๋ยวคู่เปิ้นมา จะว่าเฮาได้
เซาะหาก็เขียม เป๋นดีหุยไห้ เหลียวผ่อทางใด เปลี่ยวว้าง

[civilroom]

ม่อนนี้อยากสืบสร้าง......ยาวไป
ไผจะมาเข้าใจ๋.............พ่องนั้น
หมู่คนหลบไปไหน........ดักแซบ
หรือค่าวจะได้สั้น..........ขาดแล้วสายใย

... ตะก่อนยังม่วนแท้...........ญิงชาย
บ่าเดี่ยวได้ห่างหาย...........บ่มลี้
ปล่อยหื้อสุดเสี้ยงปล๋าย.....ตัดบั่น
ตึงนาฏน้องพี้หลี้.............บ่มาไจ

[Ck 401]

:oมาอ่านผ่อครับ แต่งบ่าจ้าง
จะไปฟั่งน้อยใจ๋เตื้อครับ เอามาลงแหมติกๆ เดวจึงจะมีคนตวยมา

[chate]

ชอบคับ...อนุรักษ์เมืองแต้ๆ กึ๊ดเติงหาบ้านน๊อกๆ
ไผตี้เข้ามาอ่านแสดงว่า...แก่ละ อิอิ....

[civilroom]

ขอวัจนัง เป๋นคำค่าวจ๊อย เรียบเรียงคำถ้อย สำนวนภาษา
เขียนที่พำนัก แต่งค่าวอู้จ๋า ส่งลอยลมมา ถึงน้องสักหน้อย
อ้ายได้บอกรัก แม่หงส์คอสร้อย บ่มีร่องรอย บ่งชี้

ถ้ารักบอกรัก คำเดียวเท่านี้ หัวใจ๋พี่อ้าย รอคอย
... หลายเดือนผ่านแล้ว ก็ดั๊กหายสอย เงียบเหงาจอยวอย หมองใจ๋โศกเศร้า
อ้ายจะขอถาม ตั๋วนายน้องเหน้า ขอหื้อนงเยาว์ ตอบชัด

อ้ายนี้รักน้อง คนเดียวเคร่งครัด บ่มีเผื่อหื้อ ไผเลย
ถึงดาวอยู่ฟ้า อ้ายขอเปิดเผย เพื่อน้องทรามเชย จะสอยหื้อได้
อ้ายนี้คนแต๊ รักน้องไจ้ไจ้ ตอบรักตัวชาย พ่องเต๊อะ

[civilroom]

กึ๊ดเติงกึ๊ดเติง ร่ำเปิงหาน้อง กึ๊ดเติงแม่ห้อง เจ้าของหัวใจ๋
กึ๊ดเติงแต๊ตั๊ก น้องรักอยู่ไกล๋ กี๊ดเติงวิไล กึ๊ดเติงขวัญหล้า
กึ๊ดเติงคืนวัน ทิตย์จั๋นทร์แจ่มจ้า กึ๊ดเติงเวลา ชื่นช้อย

กึ๊ดเติงนารี คนดีนาฏน้อย กึ๊ดเติงยอดสร้อย คนงาม
กึ๊ดเติงนาฏน้อง แม่ปล้องฝักขาม กึ๊ดเติงนงราม อยากอยู่เคียงใกล้
กึ๊ดเติงหากั๋น ตึงวันไจ้ไจ้ กึ๊ดเติงทรามวัย น้องชั้น

กึ๊ดเติงที่เคย อู้เอ่ยมานั้น กึ๊ดเติงแม่นหมั้น จุวัน
กึ๊ดเติงเทสท้อง แห่งห้องร่วมฝัน กึ๊ดเติงผูกพัน แม่หลอมหล่อเบ้า
กึ๊ดเติงญิงงาม เมื่อยามกิ๋นเข้า กึ๊ดเติงคิงเบา แต๊เล้า

กึ๊ดเติงแต่คืน จ๋นตื่นยามเช้า กึ๊ดเติงหาเจ้า คนเดียว
กึ๊ดเติงนักแต๊ หาแม่เฉลียว กึ๊ดเติงบัวเรียว ที่เคียงคู่สร้าง
กึ๊ดเติงเมื่อนอน หนุนหมอนแอมข้าง กึ๊ดเติงปากนาง ยิ้มแย้ม

[civilroom]

ญิงชายอยู่ร่วมได้............เป๋นคู่
มีจิตใจ๋ร่วมอยู่................แนบข้าง
ต่างมีฮักแลดู.................ตึงม่วน ใจ๋แฮ
มีสุขได้ร่วมสร้าง.............ม่วนล้ำสองเฮา

... ถ้าเป๋นเนื้อคู่แล้ว...........คำชาย
จะอยู่จ๋นเต้าต๋าย...........แน่แท้
ถึงจะทุกข์ญิงชาย.........จะร่วม อยู่ตวย
เนื้อคู่แท้บ่แพ้..............บ่ลี้หนีไป

[civilroom]

บ่ขอรักไผ เลยนายน้องรัก ขอพักก่อนอั้น ตัวชาย
หื้อหายเมื่อยล้า รักษาแผลใจ๋ เลือดตกช้ำใน แทบเป๋นผีบ้า
มันเป๋นเวรกร๋รม ติดต๋ามตัวข้า หื้อได้ตวยมา ชาตินี้

น้อยวาสนา ในตั๋วม่อนนี้ บ่สมน้องหน้อย คนงาม
เกิดชาติหน้านั้น อ้ายขอติดต๋าม เป๋นคู่นงราม พร้อมต๋าพร้อมหน้า
อย่าได้ห่างไกล๋ จากตั๋วน้องหล้า อยู่ร่วมชายคา น้องรัก

กำกึ๊ดเหมือนลม ตี่จะปาปัด กิ่งเก๊าปล๋ายไม้ หื้อเซิ้งคลอนไหว
อยู่หนแห่งนี้ อยู่ม่อนแดนไกล๋ กึ๊ดแล้วเป๋นใด เหมือนจะเป๋นบ้า
อยู่ตั๋วคนเดียว ไผบ่หันหน้า หยังมาใค่หุย เจ้นล้ำ

มาละหมองดาย เจ็บใจ๋เสี้ยงซ้ำ อกแตกอกม้าง ตั๋วเฮา
... เป๋นดีง่อมนัก กึ๊ดเติงหาเขา เขาบ่ฮักเฮา ปิ๊กคืนบ่ได้
ขอเว้นขอจาก อ้ายบ่าวบ้านใต้ ชาตินี้ขอลา เต๊าอี้.....
งืด


นั่งคนเดวง่อม......อ้ายหนาน

[simplack]

อ่านแล้วเพลินดีครับ