เถลิงถวัลย์ ราชันราชต๊าว นั่งแท่นผาบด้าว ครบแปดสิบห้าปี๋
ชนสยามนี้ ยินดีสุขขี ด้วยป๋ารมี รัชก๋าลเก้า
องค์ภูมิพล มงคลผ่านเผ้า ฉัตรแก้วปกเงา ไพร่ฟ้า
พระดั่งเทวัญ จ๋อมธรรม์สะง้า ชาวไทยทั่วหน้า เทิดทูน
ขอองค์บพิตร สถิตไอศูรย์ บัลลังค์ไพบูล
ย์ แดนสยามกว้าง
เป๋นพระมิ่งศรี ฤทธีเอกอ้าง ผาบไปทุกทาง ทั่วทิศ
ราชกรณีย์ ภูมีทรงคิด พินิจอ่วงข้อง ชนปวง
พระองค์ทรงเน้น เป๋นโครงก๋ารหลวง ประดุจดั่งดวง อาทิตย์ส่องหล้า
นิกรชาวไทย สดใสทั่วหน้า โขงนครา สุขล้น
ด้านก๋ารศึกษา ราชาหนุนย้น จัดก๋องทุนต้น ร่ำเรียน
มูลนิธินั้น ต่อจั๊นอ่านเขียน ส่งไปพากเพียร เมืองนอกดั่งอั้น
ทุนอานันท์ มหิดลหั้น องค์พระราชัน ตั้งไว้
ชีวิตพอดี บ่มีตุ๊กข์ไร้ เศรษฐกิจได้ พอเพียง
ประหยัดสิ่งทรัพย์ จ่ายจับอย่าเปลื๋อง เจ้าฟ้าบุญเรือง บอกแนวทางหื้อ
บุญพระมีหลาย มากมายนับตื้อ หกสิบล้านลือ แซ่ซ้อง
บันดาลฝนหลวง เขตข่วงเตสต๊อง ฝนตกต๋ามต้อง ฤดู
เกษตรไทยนี้ บ่มีอดสู เม็ดฝนหล่นจู ทั่วดินแผ่นหญ้า
พระมีเมตต๋า ประชาไต้หล้า หัวไร่แดนนา ชุ่มเชื้อ
องค์เอกบวร ภูธรอะเครื้อ ราชศรัทธาเอื้อ ในธรรม
ทรงเนกขัมมะ ผนวชศีลจ๋ำ ตั้งมั่นองค์คำ เป๋นสงฆ์เจื่องเจ้า
ก๋ารศาสนา ราชาจ๋อมเหง้า ก๊ำหนุนขึ้นเอา ยอยก
ทรงเป๋นผู้นำ อุปถัมภก ได้ปกแปล๋งสร้าง เรืองงาม
ศาสน์พุทธศาสน์คริสต์ บพิตรติดต๋าม และอิสลาม บ่มีแตกอ้า
ศาสนาใส ปวงไทยชื่นหน้า ต่างศาสดา พรั่งพร้อม
ใต้ร่มโพธิ์ทอง ไทยผองนอบน้อม มือต่างดอกส้อม ชุลี
องค์ภัทระ ราชะมิ่งศรี เปรียบดวงมณี ค่ายิ่งเอกแก้ว
มุขมนตรี เมธีผ่องแผ้ว ห้อมล้อมวาวแวว ย้อมยศ
สนมนางใน แวววัยงามงด สวยสดอ่อนอ้วน โสภา
แก้วประดับฤทธิ์ มหิทธิก๋า ด้วยพระบุญญา กษัตริย์เสกสร้าง
โยธาพหล ขุนพลเอกอ้าง รับอาญาวาง จ๋อมทัพ
คหบดี หน้าที่ผ่อทรัพย์ ผู้รับของเข้า สู่วัง
เสนาพิพัฒน์ สมบัติปลูกฝัง ตำแหน่งขุนคลัง อามาตย์วังห้อง
หัตถีอัสสา ช้างม้าแก้วก้อง สัตว์เก่งช่ำชอง ต่อรบ
สัตตะมณี มากมีสมทบ ไคว่ครบดวงแก้ว เรืองราม
จักรรตนะ พาหะติดต๋าม ยานแก้วคันงาม สัญจ๋รไต่เต้า
เจ็ดสิ่งเครื่องทรง องค์จักรพรรดิ์เจ้า ประดับเตียมเงา จ๋อมพระ
นับหกสิบปี๋ ภูมีเดชะ นาถะที่ไหว้ ราชา
องค์พระประมุข ดับทุกข์ค่ำขา หื้อไทยอาณา ได้ร่มเย็นหั้น
ปกครองธานี อยู่ดีตั้งมั่น จุเมื่อคืนวัน มานี้
รจนา วาจ๋ากล่าวจี๊ เป๋นค่าวเก่ากี้ เดิมออน
ถวายพระพร กาพย์กล๋อนเทิดไท้ น้อมไหว้กราบบังคม ก่อนแลนายเหย........