ขอฟังค่าวแบบ แซวสาวๆได่ก่อคับ ม้วนดี
สาวเฒ่ามาแล้ว อู้แจ้วจ๋าหวาน หน้าต๋าก่องาม ไผก่อไค่ได้
อยู่ตั๋วคนเดียว บางวันนั่งไห้ มันง่อมในใจ๋ นักล้ำ
ไค่ได้บ่าวน้อย หน้าต๋าคมขำ บะเอาคนดำ ป้อฮ้างป้อม่าย
เกิดมาก่อเมิน เปื้อนฝูงก่อหลาย บะหมีป้อจาย หมายใจ๋ซักห้อง
จับใส่ต๋าหัน บะนายไอ่น้อง เตวก๋ายล่องกอง เปิงใจ๋แต้ล้ำ
หน้าใสโยงๆ ผิวก่อบะคล้ำ ขาวขาวบะดำ หล่อแต้
ปี้สาวเกิดเมิน บะเกยต้อแต้ บะเกยงอแง บะเกยนั่งเศร้า
หันเป๋นจะอี๊ บะมักผัวเขา บ่าวเฒ่าลักเมา เปอะเลอะ
แต่จังหั้นอย่าง จังคนเมาเพอะ จังหยั่งขี้เปอะ ติดเต่วว่าอั้น
จามว่าตั๋วน้อง มีใจ๋แบ่งปั๋น อยากสร้างสัมพันธ์ ลองกอยก่อได้ๆ
วันนี้ปอละ ปอจุ้มหัวใจ๋ ฟั่งไปดักไซ ลาก่อนเน่อเจ้า ลาก่อนเน่อเจ้า
บ่ได้หนีไกล๋ เน่อนายปี้น้อง ยังมาเกี่ยวข้อง บ่ได้หนีหาย
ตั๋วน้องหนุ่มเหน้า ก่ใจ๋สลาย บอกฮักเปื้อนไป เสียเปิ้นบ่สู้
กั๊ดอ๊กตั๋นใจ๋ นั่งคดนั่งคู้ น้ำต๋าต๊กใน แต๊ตั๊ก
เปิ้นกึ๊ดก้าเฮา เป๋นเหมือนเปื้อนฮัก จะมากกว่านี้ ได้ใด
มอกอั้นแหละครับ น้ำต๋าปอไหล ฟกช้ำข้างใน เป๋นไห้เป๋นฮ้อง
ขอพักความเก่า เอาไว้ปี้น้อง ขอเริ่มมันกำ แหมครั้ง
ตั้งใจ๋แน่แล้ว บ่หื้อพลาดพลั้ง หวังจักหาได้ กู้เคียง
เลยหาแม่ยิง มากอยส่งเสียง อู้กำสำเนียง เป๋นม่วนเป๋นเพราะ
จะมีไผจา ตี้เปิงตี้เหม๊าะ มาผ่อมากอย อยู่เฝ้า
หุมสาวล้านนา อย่างกั๊บปี้เจ้า ครบในแรกเก๊า แม่ยิง
คนขาวคนอวบ นวลอย่างหนมผิง แหมเป๋นแม่ยิง บ่มีกู้ข้าง
อย่างนี้แล้วกา กำอย่างตี้อ้าง ปี้เจ้าว่าได ล่ะครับ
ส่วนผมนั้นแต๊ ใจ๋-ตั๋วขาวครับ บ่มีเหียแต๊ พิษภัย
น้ำเหล้าสุรา ในขวดใสใส บ่เกยจั๊บไป เทใส่ในอ้อง
หุมใส่ผ้าเมือง ของเมืองแต่งหย้อง บ่ละฮีตฮอย สืบไว้
ไขอู้ไขจ๋า ปี้เจ้าท่านไท้ ไขฟู่เอาไว้ สมาคม
ปี้จะว่าได ถ้าว่าตั๋วผม อยากชื่นอยากชม ในตั๋วปี้เจ้าๆ
ปี้ขอชื่นชม นิยมล้านนา หยังมาอู้จ๋า ม่วนล้ำ
นิสัยก่อดี ตั๋วก่อบะดำ บ่าวน้อยคมขำ ขาดกู้แอบข้าง
อดีตจ้างเต๊อะ บะดีบาดหมาง แค่ชะนีนาง บะหมีใจ๋หื้อ
ตั๋วปี้นี้นั้น ชอบอ่านหนังสือ ทำงานสองมือ เลี้ยงต๊อง
อยู่ตั๋วคนเดียว บะหมีเจ้าของ มีก้าคนจอง เอาแต้บะได้
ตะวันตกฟ้า หยังมาง่อมใจ๋ ผ่อไปตังได ง่อมแต๊
ปี้ขออาสา ขอผ่อกอยแล เป๋นดั่งผ้าแพร ห่มจิ้น
จะกอยเฝ้าผ่อ อย่างไข่ในหิน เอาฝังในดิน เอาหินมาป้อง
นิยมล้านนา บะหมีมัวหมอง ถ้ามาเกี่ยวดอง ในตั๋วปี้เจ้า
วันนี้ปอละ มอกหายง่อมเหงา หายซึมซบเซา น่ออ้าย
อู้แต้กาจุ๊ ก่อบ่อเสียหาย อู้เล่นบะดาย จ้วยคลายความเศร้า
นิยมล้านนา หากชอบสาวเฒ่า ไลจังน้องเน้า ก่อแสนยินดีๆ
;Dอิอิ
สำนวนก่หวาน น้ำต๋าลน้ำอ้อย ปอหวานหย๊ดย้อย กำถ้อยกำจ๋า
ตั๋วปี้ไลจัง ตอบค่าวมาหา นิยมล้านนา ใจ๋จื้นเหียใบ้
แต่กลั๋วอายุ ของน้องบ่ใกล้ กั๊บตั๋วปี้ไล คนเพราะ
แต่เรื่องล้านนา ตึงเปิงตึงเหม๊าะ บ่ต้องได้เซาะ ตางใด
หนุ่มหน้อยหน้าหนิม แม่ยิงต๋าใส น้องกั๊บปี้ไล เหม๊าะเหลือเสี้ยงถ้าน
ตั๋วปี้ไลจัง แม่สร้อยดอกป้าน แม่ตั๋วคนงาม ปี้เจ้า
ว่าน้องนี้หนา ยังคงซึมเศร้า กั๊บเรื่องเก่าๆ ผ่านมา
ฮักเปิ้นข้างเดียว มาเมินนักหนา ขาดคนเยียวยา หัวใจ๋ดวงหน้อย
จะขอรบก๋วน แม่หงส์คอสร้อย เป๋นคู่จ๋าถ้อย กั๊บน้อง
หามาเมินนัก สาวอู้จ่องก๊อง คนมาอู้ถ้อง ค่าวซอ
แหมยังเข้าใจ๋ ในตั๋วน้องหนอ ใจ๋จื้นแต๊นอ สุขเหลือเจ่นล้ำ
ตะก่อนเมินมา ใจ๋ฟกใจ๋จ๊ำ หน้าหนาวแหมกำ ง่อมใบ้
ขอถามตั๋วปี้ เป๋นคนตางไหน จะได้ไปไจ ซักกำ
สูมาเน่อครับ กำไหนมันหลำ ขอปี้อย่านำ ไปติดใจ๋เจ้าๆ
หยังมาปากหวาน น้ำต๋านน้ำอ้อย จุ๊ปี้ขึ้นดอย หลงล้ำ
นิยมล้านนา บ่าวน้อยคมขำ ค่าวจ้อยลำนำ ม่วนใจ๋แต้เจ้า
เฮาตึงเปิงกั๋น อย่างดอยกู้เขา เหมือนกิ๋นยำเตา กู้กับปู๋น้อย
ถามถึงถิ่นฐาน ก่อไกล๋จอยวอย บ้านอยู่ในดอย แม่ริมปู้นเจ้า
นิยมล้านนา หัวใจ๋ง่อมเหงา ไปเต๊อะไปเฮา แอ่วดอยป่าเมี้ยง
ปี้จะปาน้อง ไปกิ๋นบะเกี๋ยง ไปกิ๋นแก๋งเรียง ใส่ป๋าหลิมแห้ง
อายุปี้นี้ เลขสี่สีแดง ตะวันยามแลง สดใสอย่างอั้น
ถามถึงอายุ ของเฮาต่างกั๋น ต่างก้าเดือนวัน เต้าอั้นเน่อเจ้า
หน้าหนาวปี๋นี้ มันตึงบะเหงา มีปี้เป๋นเงา กอยเตวกู้อู้
ตั๋วปี้ไลจัง ขอเป๋นกู้หู จะผ่อเอ็นดู หัวใจ๋ดวงน้อย
นิยมล้านนา หื้อหายเศร้าสร้อย อารมณ์บะจอย หมดเสี้ยง
กำอู้กำจ๋า ทำนองสำเนียง ตี้ปี้เรียบเรียง จากใจ๋เน่อเจ้าๆ
ใจ๋ดีแต๊หนอ ตั๋วไลปี้จั้น จั๊กจวนน้องนั้น แอ่วป่าไพรสนธ์
ยามน้องอ่านค่าว อย่างอื่นบ่สน เป๋นคนละคน ว่าได้อย่างอั้น
เพราะแต๊ปี้เหย บ่เกยปิดกั้น กำหยังมางาม เหมาะล้ำ
บ่ไกล๋บ่ไกล๋ เจียงใหม่บ่ล้ำ แม่ริมยามค่ำ ยังงาม
แต่น้องยังงง เลยจักขอถาม ปี้ตั๋วคนงาม อยู่ไหนแน่เจ้า
เจียงฮายเจียงใหม่ งงแต๊ปี้เจ้า ขอปี้บอกกำ ถิ่นห้อง
แหมว่าน้องนั้น ยังบ่เลขสอง อายุของน้อง ป้อจาย
กลั๋วว่าใกล๋ล้ำ กั๊บปี้นักหลาย ขอเป๋นน้องจาย จะได้ก่เจ้า
น้องติดโวหาร สำนวนแบบเบ้า กำนั้นงามเลา เหียแต๊
ว่าเหม๊าะตึงเหม๊าะ บ่ได้ต๋อแหล กำม่วนเหม๊าะแต๊ ค่าวซอ
ขอปี้เป๋นกู้ อู้ค่าวนั้นหนอ ซักวันนั้นนอ ไปไจว่าอั้น
ขอปี้บ่โขด บ่บิ่นหลังต๋ำ ยังกิ๋นเข้าลำ ยิ้มเหมือนในฮูปน่อเจ้าๆ
เริ่มกึ๊ดกำบ่ออกแล้วครับ ผมบ่ได้เฮียนมาเนาะ
ได้ก่าน้องรัก นิยมล้านนา จะมาอาสา เป๋นน้องบ่าวปี้
อายุยังน้อย ยังเป๋นบ่าวจี๋ ห่างปี้หลายปี๋ นักล้ำ
ปี้ตึงบะโขด บะบิดหลังต๋ำ ยังกิ๋นข้าวลำ ยิ้มงามพี้ลี้
ถามถึงบ้านแต้ จากมาหลายปี๋ บะได้อยู่ดี แต่น้อย
จบก๋านศึกษา ก่อเตวอ้อยซ้อย ลงมาจากดอย หาเงินเลี้ยงต๊อง
เจียงฮายถิ่นนี้ เป๋นบ้านตี้สอง บะได้เป๋นรอง เจียงใหม่เน่อเจ้า
แล้วตั๋วน้องลอ ถามก้าปี้เขา อู้ม่วนงามเลา เปิงใจ๋ปี้ใบ้
ขอถามกำเต๊อะ เป๋นคนตี้ไหน เยี๊ยะก๋านตังได หยังมาเก่งล้ำ
อายุยังน้อย หน้าต๋าคมขำ เก่งเขียนลำนำ ป๋ายถึงค่าวจ๊อย
นิยมล้านนา ละอ่อนหนุ่มน้อย จะแวะมากอย ปี้ไลก่อเจ้า
ปี้สาวไลจัง ยินดีแต้เล้า ถ้าตั๋วน้องเหน้า มาไจ
วันนี้ปอละ มอกม่วนในใจ๋ จะมาเมื่อได โทรมาเน่อเจ้าๆ
อิอิ
ขอบคุณปี้ไล แต๊ตั๊กนักหนา ปั๋นโอกาสมา หื้อกั๊บน้องเจ้า
ตั๋วน้องนี้หนา ยังเริ่มไต่เต้า บ่แน่แต๊เจ้า เรื่องค่าวเรื่องซอ
เพราะว่าใจ๋ฮัก สนใจ๋แต๊หนอ บ่เกยยั้งปอ น่อเจ้า
เหมือนลมหายใจ๋ สูดออกสูดเข้า ฟังแล้วบ่เศร้า ตางใด
มอกปอเล่าอู้ มอกฟู่จ๋าไข อู้ถ้องเรื่อยไป หื้อม่วนใจ๋เหล้น
เสียดายบ่มี ครูมาเต๊กเน้น เลยบ่ชัดเจน แต๊ตั๊ก
ลางเตื้อหาฟัง ได้ยินมานัก เจียงใหม่เมืองน่าน ก่ดี
ว่าเถ้าแก่ค้าว หมากป๊าวหมูสี จ้องไจ้มันมี แป๋งน้ำบวยหน้อย
ค่อยสืบค่อยสาน กำจ๋ากำถ้อย คนสืบฮีตฮอย บ่นัก
เลยซัวะเวียกก๋าร มาอนุรักษ์ ล้านนาแหมนั้น ค่าวซอ
แหมตั๋วเมืองนั้น เข้าใจ๋แต๊หนอ กะขะก่ปอ อ่านออกเขียนได้
พ่องว่าน้องบ้า บ่ต้องไปใกล้ ปล่อยเขาอู้ไป จ้างเต๊อะ
ตั๋วน้องนั้นแต๊ คนบ่เลอะเทอะ บ่เกยกิ๋นเหล้า เมายา
จื้อเล่นแต๊ๆ จื้อหนุ่มนั้นหนา ศุภกิตแหมกา เป๋นจื้อแต๊เจ้า
บ้านอยู่โขงเขต เจียงคำบ่เศร้า จั๋งหวั๊ดพะเยา แหมนั้น
ก๋ำลังจะเข้า มช.ปี้จั้น บ่ได้ย๊ะก๋าร ตางได
ว่างๆก่ขี่ รถเครื่องแอ่วใกล๋ เมืองน่านเจียงฮาย ไปเหียหม๊ดเสี้ยง
แหมอย่างน้องเป๋น วัยรุ่นมักเหมี้ยง กี่อมก่เสี้ยง เหียหม๊ด
อู้บ่ก้อยหวาน เหมือนน้ำต๋าลหยด แต่บ่ขี้จุ๊ อู้ยอ
ในอนาคต น้องอยากเป๋นหมอ สู่ขวัญนั้นนอ เหม๊าะเหลือเสี้ยงถ้าน
เก๊าไม้มีดอก ก่ย่อมมีก้าน จ้าดเจื้อวงศ์วาร เป๋นลื้อ
ตี้อู้มาหม๊ด บ่ได้ไขสือ บ่ได้อู้หื้อ ผิดไป
ซื่อสัตย์เป๋นเก๊า แหมยังจริงใจ๋ นับถือปี้ไล เป๋นเอื้อยน้องเจ้าๆ
ใจ๋จื้นเจยบานขนาด.
หน้าหลักเว็บไซต์
เพื่อทีมงานจะได้ดำเนินการลบออกให้ทันที..."
ผู้เขียน
