พระราชวังของกษัตริย์ล้านนา

[เมือง_ คนเจียงฮาย]

ใผปอฮู่ผ้องครับ ว่าพระราชวังเก่าแก่ ของเจียงฮาย เจียงแสน  เจียงใหม่ ตั้งอยู่ตี้ไหน(บริเวณไหน)ในปัจจุบัน และมีอะหยังหื้อหันเป๋นหลักฐานพ่อง รวมถึงสมบัติและเครื่องแต่งก๋าย ทั้งพระมหากษัตริย์ และพวกขุนนาง ตวย  ครับ   ขอบคุณล่วงหน้าครับ

[เชียงรายพันธุ์แท้]

พระราชวัง คนล้านนาก่อนเปิ้นฮ้องว่า หอคำ หรือ คุ้ม น่อ

พระราชวังของกษัตริย์ในราชวงศ์มังราย หรือ คุ้มเวียงแก้ว แป๋งสมัยพญามังราย
ตั้งอยู่กลางเวียงเจียงใหม่ บ่าเดี่ยวเป๋นที่ตั้งของทัณฑสถานหญิง
ซึ่งก่อนหน้านี้ก็เป๋นเรือนจำกลางเจียงใหม่มาก่อน
คนเจียงใหม่เปิ้นฮ้องว่า "คอกก๋างเวียง"

บ่ต้องแปลกใจ๋น่อว่าจาใดเปิ้นเอาหอคำพญามังรายไปแป๋งเป๋นคอก
เรื่องนี้คนเจียงใหม่ฮู้กั๋นมาเมินแล้ว แต่ปากนักบ่ได้

ข้อมูลเพิ่มเติม
http://www.oknation.net/blog/print.php?id=338739

[Singhakara]

มันหายไปต๋ามก๋านเวลาล้ะครับ..คนปัจจุบันหาได้ระลึกนึกถึงสิ่งเหล่านี้เลยครับ
ผู้นำท้องถิ่นบ่าเด่วนี้เลยบ่าได้ใส่ใจ๋อะหยังเลย..บ้านเมืองเลยไกล้ตกขึดติ้กๆเลยครับ

ผ่อเอาเต้อะที่หอคำหลวงเจ้าฟ้าเชียงตุงที่รัฐบาลพม่าเอาแป๋งเป๋นโรงแรมผ่อมีไผ๋อยู่ได้หัน

มันตกขึดครับ.

[อาฮักเก๊าบ่าห้า]

กำแท้เอาวังไปสร้างคุกใครคิดเนี่ย ...... งั้นนักโทษอยู่คุกเหมือนอยู่วังอะสิ

[เมือง_ คนเจียงฮาย]

ยินดีขนาดสำหรับข้อมูล อ้ายเจียงอายพันธ์แต้ครับ ตี้จริงของบ่าเก่าเฮาตี้เกี่ยวข้องกับพระมหากษัตริย์ล้านนาเฮานี่ หมู่เฮาลูกหลานได้เก็บฮักษาอะหยังกั๋นไว้บ่าฮู้น่อ เจ้นดาบ  หอก กุบหรืองอบ(พระมหาพิชัยมงกุฏ)บ่าฮู้ว่าจั้งมีไผเก็บไว้พ่องก่อหา ไว้หื้อลูกหลานได้หัน ได้ผ่อ ได้ภูมิใจ๋ที่ได้เกิดเป็นคนเมือง ล้านนาครับ

[เชียงรายพันธุ์แท้]

ยินดีขนาดสำหรับข้อมูล อ้ายเจียงอายพันธ์แต้ครับ ตี้จริงของบ่าเก่าเฮาตี้เกี่ยวข้องกับพระมหากษัตริย์ล้านนาเฮานี่ หมู่เฮาลูกหลานได้เก็บฮักษาอะหยังกั๋นไว้บ่าฮู้น่อ เจ้นดาบ  หอก กุบหรืองอบ(พระมหาพิชัยมงกุฏ)บ่าฮู้ว่าจั้งมีไผเก็บไว้พ่องก่อหา ไว้หื้อลูกหลานได้หัน ได้ผ่อ ได้ภูมิใจ๋ที่ได้เกิดเป็นคนเมือง ล้านนาครับ

อันนี้สีท่าจะต้องแป๋งของจำลองหื้อละอ่อน (และคนใหญ่) ผ่อแล้วก้าหา

[เด็กอินเตอร์]

http://www.cmocity.com/park/basic_info.html

โครงการจากคุกเป็นสวน

[เด็กอินเตอร์]

http://www.chiangmai-thailand.net/grand_palace/horkum.htm

หอคำ พระราชวังของกษัตริย์เชียงใหม่

[nataann]

เหมือนประตูเมืองต่างๆ ของเชียงราย ก็ไม่เหลือซาก เพราะมัวแต่หลงความศรีวิไล ไปยอมให้ฝรั่งที่มาตั้งรพ.โอเวอร์บรูค ออกแบบแปลนเมืองเชียงรายขึ้นใหม่ แล้วรื้อถอนประตูเมืองเก่าๆ ทิ้ง

[ละอ่อนโบราณ]

ข่มไว้ก่อนก้าเนาะ 

[อะไร?ยังไง?]

เหมือนประตูเมืองต่างๆ ของเชียงราย ก็ไม่เหลือซาก เพราะมัวแต่หลงความศรีวิไล ไปยอมให้ฝรั่งที่มาตั้งรพ.โอเวอร์บรูค ออกแบบแปลนเมืองเชียงรายขึ้นใหม่ แล้วรื้อถอนประตูเมืองเก่าๆ ทิ้ง

ต้องทําจั๋ยอะเจ้า สมัยนั้นเจียงฮายก่อแค่ส่วนหนึ่งในมลฑลพายัพ ก๋านตี่โดนผนวกเข้าสยามเลยต้องโดนป๋าใหญ่กิ๋นป๋าน้อยควบคุมจะอี้แล ของฮองเฮามันบ่าก่อยมีค่าอย่างฮองเปิ้น มันก่อเลยต้องโดนรื้อถอน หุ หุ

สมัยนั้นสมัยตี่ไทยต้องก๋านเทียบเท่าตะวันตกเล่อ หื้อผรั่งหันว่าบ่ใด้ล้าหลังอิเนาะ จะว่าไปก่อตลกเน่อ ยุคบุกเบิกต้อนฮับรับเชิญฝรั่งจ๊าดดี (คือแบบว่าหวังหื้อมาจ่วยพัตนาชาติ) จ้างนายฝรั่งหื้อคุมคนในมลฑลต่างๆ (คุมเพราะกั๋วเป๋นกบฏต่อสยาม) ปอจะโดนล่าอณานิคมก่อเลยหวั่นๆฝรั่งมาจ๋นบ่าเดียว เห่อ เห่อ

[nataann]

สูมาเต๊อะ
ผมว่าถ้าเจ้ากาวิละ ยกเจ้าดารารัศมี ไปเป็นบุตรบุญธรรมของควีนวิคตอเรีย จักรพรรดิ์อังฤษ
แล้วบ่ได้เป็นพระราชชายาของ รัชกาลที่5 คิดว่าอาณาจักรแถบล้านนาก็คงเป็นเมืองขึ้นอังกฤษ บะเดี๋ยวจะเป็นจาใดผ้องเนาะ อาจจะเจริญเทียมเท่าสิงคโปร์ หรือเป็นเมืองเงียบสงบเหมือนภูฎาน  อิอิ

[ล้อล้านนา]

คุ้มหลวงพญามังราย อยู่บริเวณตี๋นดอยตึงสาม ได้แก่ ม่อนจ๋อมตอง ม่อนจ๋อมแจ้ง ม่อนจ๋อมแว่ (ต๋อนหลังจื่อของม่อนดอยหมู่นี้ฮ้องใหม่หลายจื่อ เช่น ม่อนจ๋อมแว่ ฮ้องสมัยหลังสงครามโลกฯ เป็น ดอยจำปี เป็นต้น) ที่ตั้งของคุ้มหลวงพญามังรายนั้น เกยมีหลักฐานเป็นฮ่องฮอยของขอบเขต และข้าวของเครื่องใช้ แต่บ่สามารถบ่งบอกสิ่งก่อสร้างได้ เพราะคุ้มหลวงสมัยนั้นคงบ่ได้สร้างเป็นถาวรสถานดังเช่นสมัยอยุธยาตี้สร้างวังให้เหมือนที่อยู่ของเทพ (กษัตริย์เลยถูกกำหนดเป็น สมมุติเทพ มาถึงปัจจุบัน) บ่าเด่วนี้พอชี้จุดได้ว่าคุ้มหลวงพญามังรายอยู่บริเวณที่เป็นอาคารราชพัสดุตึงหมดไล่ถัดจากหลัง รร.คริสต์ ถึงสี่แยกร้านเวียงทองบุ๊ค (หรือสี่แยกหมอประจักษ์หั้นแล) หากได้ข้อมูลเพิ่มเติมจะนำมาอู้หื้อกั๋นฟังแหมกำเน้อ

ส่วนคุ้มหลวงเจ้าเมืองเจียงฮายอยู่ในบริเวณ รร.ดำรงฯ ในนั้นมีตึงคุ้มหลวง เฮือนคนใจ้ คอกขังคนฮ้าย ข่วง และวัดเจียงหมั้น อาณาบริเวณคุ้มหลวงกว้างไปถึง "คอกเก่า" เรือนจำกลางฯ สมัยนั้น โดยภายหลังประเทศสยามเข้ามามีอำนาจเหนือล้านนา ได้ก่อยๆ ส่งข้าหลวงเข้ามาประกบเจ้าเมืองแบ่งอำนาจการปกครองออกมา โดยสร้างบ้านหื้อข้าหลวงหมู่นั้นอยู่ตึง 4 แจ่งคุ้มหลวง บ่าเด่วยังเหลืออยู่ 3 หลังไปผ่อกั๋นได้ หลังแรกอยู่บริเวณตึกร้านอาหารบ้านกลางเวียง ต๋อนนี้ยังเหลือบ้านเก่าตรงข้ามวัดก๋างเวียง 1 หลัง แจ่งตี้สองอยู่ติดกับ ธ.ไทยพาณิชย์ ถ.รัตนาเขต เป็นตี้เอกชนและมีบ้านเก่าข้างโบสถ์คริสต์ 1 หลัง แจ่งตี้สามถูกรื้อไปเป็นบ้านพักอัยการทนาย อยู่หลังคอกเก่า แจ่งตี้สี่อยู่บริเวณตั้งแต่เซเว่นข้างอาชีว ไล่ยาวไปถึงข้าง รร.ดำรงฯ ถ.วิเศษเวียง อย่างตี้บอกว่าในคุ้มหลวงมีอะหยังหลายๆ อย่าง กระนั้นก็ถูกรื้อไปในช่วง 2459-60 (ตัวเลขไม่บ่ชัดเจน) เพื่อยะเป็นโฮงเฮียน ข้าวของวัดเจียงหมั้นถูกรื้อไปเป๊าะไว้วัดศรีบุญเรือง ตั๋วคุ้มหลวงเป็นอาคารถาวรสร้างทับอยู่ บ่าเด่วเหลือก้าเฮือนคนใจ้ไว้เป็นอนุสรณ์ ข้อสังเกตว่ารัฐบาลสยามพยายามจะกลืนวัฒนธรรมและใช้วัดหรือคุ้มหลวง เป็นสถานศึกษา และสถานที่ราชการ รวมทั้ง "คอก" ตวย เพื่อเป็นการข่ม "ขึ๊ด" ว่าอั้นแล...